Stykkishólmspósturinn - - Verðlaun í eldvarnargetraun

Landssamband slökkviliðs- og sjúkraflutningamanna stendur árlega fyrir eldvarnarátaki fyrir jól og áramót. Hluti af því átaki er samræmd eldvarnafræðsla á landsvísu í grunnskólum landsins þar sem slökkviliðsmenn vítt og breitt um landið heimsækja grunnskólana í sínu umdæmi og veita öllum 8 ára börnum fræðslu í grunnatriðum eldvarna.

Það eru því alltaf nemendur 3.bekkjar sem fá þessa fræðslu og í lok nóvember s.l. heimsótti Þorbergur Bæringsson slökkviliðsstjóri krakkana í 3.bekk Grunnskóla Stykkishólms og fræddi þau um eldvarnir og þær hættur sem óvarleg umgengni við eld getur haft í för með sér. Krakkarnir tóku einnig þátt í eldvarnargetraun eins og jafnaldrar þeirra um land allt.

Í síðustu viku var svo dregið úr réttum svörum og það voru 32 heppnir krakkar sem voru dregnir út og fengu verðlaun. Einn þessara krakka var nemandi í 3.bekk Grunnskóla Stykkishólms og það var hún Þórhildur Hólmgeirsdóttir. Þorbergur heimsótti krakkana í 3.bekk í s.l. föstudag og afhenti Þórhildi verðlaunin sín sem voru viðurkenningarskjal, MP3 spilari, reykskynjari og blaðið Slökkviliðsmaðurinn.

Þórhildur vinningshafi og Þorbergur slökkviliðsstjóri.