Það verður allt ókeypis og með veglegasta móti þegar skákmót Árnamessu verður haldið öðru sinni í grunnskólanum Stykkishólmi sunnudaginn 14. mars á afmælisdegi Árna Helgasonar sem hefði orðið 96 ára þennan dag. Mótið hefst kl. 13:00 og því lýkur kl. 16:00. Stefnt er að þátttöku allra efnilegustu skákkrakka landsins á grunnskólaaldri. Teflt verður í þremur flokkum; fæddir 1994 - 1997, fæddir 1998 - 2003 og loks í flokki Snæfellinga.

       Áhugasamir grunnskólakrakkar í Stykkishólmi og öllu Snæfellsnesi, bæði strákar og stelpur eru hvattir til að taka þátt í mótinu og skrá sig á skrifstofu grunnskólans á morgun eða mæta til skráningar í upphafi mótsins á laugardag. Tefldar verða sex umferðir og umhugsunartíminn er 10 mínútur. Lýðheilsustöð veitir þremur efstu í hvorum flokki verðlaunabikara auk þess sem þrír efstu Snæfellingarnir fá verðlaunabikar eða pening.

       Nú þegar tveir dagar eru til mótsins er ljóst að nær allir bestu skákkrakkar landsins eru á leið í Hólminn til að taka þátt í þessu glæsilega skákmóti. Þar ber fyrst að nefna sveit Salaskóla í Kópavogi sem vann Norðurlandamót grunnskóla sl. haust. Einnig rúmlega 20 krakka frá Rimaskóla með Íslandsmeistarasveit skólans í barnaskólaflokki í fararbroddi. Einnig má nefna stúlknaskáksveit Hjallaskóla í Kópavogi sem vann Íslandsmeistaramót stúlkna fyrir stuttu. Meðal þátttakenda má nefna Örn Leó Jóhannsson úr Laugalækjarskóla sem náði frábærum árangri á alþjóðlega Reykjavíkurskákmótinu um daginn og Hrund Hauksdóttur Rimaskóla margfaldan Íslandsmeistara stúlkna. Um 20 - 30 vegleg verðlaun verða veitt í lok skákmótsins og verða þar páskaeggin frá Góu og Nóa / Síríus fyrirferðarmest. Einnig verða veitt peningaverðlaun, fatnaður frá 66°N, gjafabréf frá Elkó og hamborgaramáltíðir frá Metró. Í lok verðlaunaafhendingar verður dregið í happadrætti allra þátttakenda þar sem aðalvinningar verða dvöl í sumarbúðum KFUM og K. Útgerð Sæfells hf býður keppendum upp á pylsuveislu fyrir mót og hagstæðar veitingar í skákhléi . Allir sem koma að skipulagi skákmóts Árnamessu eða gefa vinninga vilja með því heiðra minningu Árna Helgasonar og þess æskulýðsstarfs sem hann vann sem gæslumaður í barnastúkunni Björk í áratugi.

       Skipuleggjandi og aðalhvatamaður skákmótsins er Helgi Árnason „Hólmari“ og formaður skákdeildar Fjölnis sem mun stýra mótinu ásamt Páli Sigurðssyni landsmótsstjóra Skáksambandsins í skólaskák. Bæjarstjórinn í Stykkishólmi Erla Friðriksdóttir mun setja skákmótið kl. 13:00 og afhenda verðlaun í lok þess.

       Stykkishólms-Pósturinn vill fagna þessu framtaki sem Skákdeild Fjölnis í Grafarvogi skipuleggur með stuðningi Velferðarsviðs Reykjavíkur, Skákstyrktarsjóðs Kópavogs og  Lýðheilsustöðvar og hvetja Hólmara á grunnskólaaldri til þátttöku í mótinu og bæjarbúa til að koma við í grunnskólanum á sunnudag og fylgjast með skáksnillingum framtíðarinnar að tafli á Árnamessu.